ភ្នំពេញ៖ រាជរដ្ឋាភិបាលកម្ពុជាបានបង្ហាញនូវការសោកសង្រេកចំពោះការបាត់បង់ជីវិតមនុស្សជាច្រើននាក់ក្នុងហេតុការខ្យល់ព្យុះកំបុតត្បូងនៅរដ្ឋមួយចំនួននៅភាគខាងលិច និងខាងត្បូងសហរដ្ឋអាមេរិក។

ក្នុងសេចក្ដីប្រកាសព័ត៌មានចុះថ្ងៃទី១៦ ខែធ្នូ ឆ្នាំ២០២១នេះក្រសួងការបរទេសលើកឡើងថា៖ «ស្ថិតក្នុងគ្រាដ៏សែនសោកសៅ និងលំបាកនេះ រាជរដ្ឋាភិបាល និងប្រជាជនកម្ពុជា សូមចូលរួមរំលែកទុក្ខដោយស្មោះស្ម័គ្រជាមួយប្រជាជនអាមេរិក និងសូមសំដែងសេចក្ដីទុក្ខដ៏សែនក្រៀមក្រំ និងក្ដីអាណិតអាសូរ ជូនចំពោះក្រុមគ្រួសារទាំងឡាយ ដែលបានបាត់បង់មនុស្សជាទីស្រលាញ់របស់ពួកគេ និងសូមបួងសួងឱ្យជនរងគ្រោះជាច្រើនផ្សេងទៀតដែលកំពុងបាត់ខ្លួនមានសុវត្ថិភាពគ្រប់ៗគ្នា» ។

យ៉ាងហោចណាស់រដ្ឋចំនួនប្រាំមួយនៅសហរដ្ឋអាមេរិករួមមាន Arkansas, Illinois, Kentucky, Missouri, Mississippi និង Tennessee ត្រូវបានវាយប្រហារដោយព្យុះកំបុតត្បូងកាលពីយប់ថ្ងៃសុក្រ សប្ដាហ៍មុន ដែលបានសម្លាប់មនុស្សយ៉ាងហោចណាស់៧០នាក់ និងផ្ទះរាប់ម៉ឺនខ្នងត្រូវបានបំផ្លិចបំផ្លាញ៕